الرئيسية آراء و مقالات جعفر عباس يكتب : دا عربي دا يا مرسي؟ (سؤال يتجدد)..

جعفر عباس يكتب : دا عربي دا يا مرسي؟ (سؤال يتجدد)..

بـ النورس نيوز

نشرت هذا النص الذي وصلني عبر واتساب قبل سنة بالضبط، على أمل أن اجد مترجما يساعدني على فهم مفرداته وعباراته، ثم اكتشفت ان معظمكم إما عجم مثلي او عرب تايوان، وهأنذا أعرضه عليكم مجددا على أمل ان أجد ود/بت عرب يتولى الشرح:
قاﻝ ﻟﻴﻬﻮ : ﻭﻳﻦ ﺍﻧﺖ ﻳﺎﺯﻭﻝ؟ ﺍﻟﺘﺎﻧﻲ ﻗﺎﻝ : ﺍﻧﺖ ﺍﻟﺒﺎﺭﺡ ﻣﺎ ﺧﻠﻴﺘﻨﻲ ﻓﻮﻕ ﺍﻟﺤﺎﺣﺎﻳﺔ (1). ﺑﺲ ﻓﻮﺗﻚ ﺷﻠﺖ ﻟﻘﺎﻭﻱ (2) ﻭﻣﺸﻴﺖ ﺍﻟﺒﺎﺭﺍﺑﺎ (3) ﻣﺮﺓ ﺍﻃﻖ ﺍﻟﻠﻘﺎﻭ (4) ﻭﻣﺮﺓ ﺍﻫﺰ ﺍﻟﻌﺎﺭﺍﺕ (5) ﻻﻣﻦ ﺟﻴﺖ ﺑﻲ ﻋﻨﺪ ﺯﺭﻳﺒﺔ ﺍﻟﻌﺒﺮﺍﻥ (6) ﺍﻟﻼﺕ ﺍﺑﺮﺍﻫﻴﻢ . ﻟﻘﻴﺖ ﻟﻲ ﺍﺗﺮ ﺍﻟﻠﻴﻞ ﺍﻡ ﺻﻔﻴﺮﺍ (7) ﺑﺎﺭﻳﺘﻮ ﻟﻲ ﻋﻨﺪ ﺍﻟﺪﺷﺔ (😎 ﺍﻟﺠﻤﺐ ﺑﺎﺑﻮﺭ ﺍﻟﻨﺰﻳﺮ ﻟﻘﻴﺘﺎ ﻭﻗﻌﺖ ﺍﻟﺒﺤﺮ ﻋﺎﻳﻨﺖ ﻓﻲ ﺍﻟﻮﻏﺶ (9) ﻟﻘﻴﺖ ﻟﻲ ﺟﺤﺮﺍ ﻛﺒﻴﻴﻴﻴﺮ ﺍﻧﺎ ﻗﺎﻳﻠﻮ ﺟﺤﺮ ﺍﻟﺰﺑﺎﺩﺓ (10) ﺍﻟﻜﻤﻠﺖ ﺟﺪﺍﺩﻧﺎ ﻗﻢ ﻛﻮﺭﻛﺖ ﻟﻠﺸﻴﺦ ﻗﺘﻠﻮ ﺟﻴﺐ ﺍﻟﻜﺠﺎﻡ (11) ﺑﺘﻠﻘﺎﻫﻮ ﺗﺤﺖ ﺍﻟﺴﻴﺪﺍﺏ (12) ﺍﻟﻔﻲ ﺍﻟﺨﺲ (13) ﺟﺎﺑﻮ ﻭﻗﻤﻨﺎ ﺷﺮﻛﻨﺎﻫﻮ ﺑﻲ ﺯﺭﺯﻭﺭ ﻭﻣﺸﻴﻨﺎ ﻋﻠﻲ ﺍﻟﺤﺎﺣﺎﻳﺔ ﺑﻌﺪ ﺷﻮﻳﺔ ﺳﻤﻌﻨﺎ ﺍﻟﻮﺍﺭﺹ (14) ﻭﻗﻤﻨﺎ ﺟﺎﺭﻳﻦ ﺣﺴﻴﻦ ﺷﺎﻳﻠﻮ ﺍﺭﺑﻞ (15) ﻭﺍﻧﺎ ﺷﺎﻳﻞ ﻛﺪﻧﻜﺔ (16) ﻗﻠﻨﺎ ﺧﻼﺱ ﺍﻟﻜﺠﺎﻡ ﺟﺎﺏ ﺧﺒﺮ ﺍﻟﺰﺑﺎﺩﺓ ﺑﻼ ﻧﻠﻘﺎﻫﻮ ﻗﺎﺑﻀﻠﻮ ﺻﺒﺮﺓ ﻋﺠﻮﺯ ﻛﺘﻠﻨﺎﻫﺎ ﻭﺟﺪﻋﻨﺎﻫﺎ ﻓﻲ ﺍﻟﺒﺤﺮ ﻭﻃﻮﺍﻟﻲ ﻣﺸﻴﺖ ﻋﻠﻲ ﺍﻟﺴﺮﻳﺘﻖ (17) ﺍﻟﻠﺖ ﺍﻣﺤﺪﺯﻳﻦ ﺳﻘﺘﻬﺎ ﻭﻣﺸﻴﺖ ﻋﻠﻲ ﺍﻡ ﻛﻮﺑﻚ(18) ﻟﻘﻴﺘﺎ ﻗﺎﺑﻀﺎﻻ ﻛﺎﺑﺮﻭﺳﻴﻦ (19) ﻭﺩﺑﺴﺔ (20) ﻭﺗﻼﺗﺔ ﻛﻨﺎﻛﻴﺞ (21). ﺷﻠﺘﻬﻦ ﻭﻣﺸﻴﺖ ﻋﻠﻲ ﺍﻟﻌﺎﺯﺓ ﺣﻤﺮﺕ ﻟﻲ ﻣﻨﻬﻦ ﺍﻛﻠﺖ ﻭﻧﻤﺖ ﻭﻫﺴﻊ ﻫﺎﺩﻱ ﻗﻮﻣﺔ .
من أرسل لي هذا النص قال إنه اختبار لمعرفة مدى إلمامي بالعامية السودانية، ولكنني رسبت فيه بتقدير ممتاز، والكلمات المتبوعة بأرقام هي التي عجزت عن فهمها، وأعطيكم الفرصة مجددا واعتبروه “ملحق الاختبار”، لأن نسبة الرسوب كانت عالية في المرة الأولى



اكتب تعليقاً